نحن متين فارقنا الكسره

من طرف بت الصادق الأحد أكتوبر 31, 2010 3:05 pm

سيادة الوزير.. نحن متين فارقنا الكسرة لحدي ما نرجع ليها؟
د. عادل الصادق مكي

- نضم السيد وزير المالية ما مطن تب.. القال فيهو الناس يرجعو للكسرة. عشان لو حصل الانفصال يمكن الرغيف ينفصل مع الجنوب. الرغيف واخواته من الرضاعة الباسطة والبسبوسة. لكن انشا الله يكونن خاتات راسن مع المسيرية. عشان ما نقعد نحن نتلفت.. سيادة الوزير اطمن تب وخت في بطنك بتيخة صيفي..الكسرة دي ما فارقناها اصلنا. وما ممكن نفارقها وما عندنا اي طريقة نفارقها.. اظنك انت مطوّل منها؟. اها وقت النضم جاب النضم النحدسك.الكسرة اتغيرت سيادتك وبقت تغيانة. اتغي من الرغيف.. واتفلهمت علينا. انت ان بقيت قلبك علينا انضم معاها وخليها تخلي الفلهمة والبوبار دا وترخص عشان ناكلها لحدي ما نشبع.. سيادتك الكسرة بقت اغلى من الرغيف.أخاف انت ما عندك خبر؟ واللا الخبر دا لسه ما وصلكم فوق؟..خمسة طرقات كسرة بجنية وخمسة رغيفات بجنية.. علما بان الخمسة طرقات كسرة ما يجيبن رغيفة واحدة. شفت الفلهمة دي؟. وبعدين الواحد بقى يشتري كسرة ياكلها بالدس. يتحشر في اوضة من وليداتو ويقعد ياكل. البيحميها تتفلهم شنو؟ ما دام زمان كانو بيعوسوها بالقرقيبة حسي بقت تتعاس بالاسكراتش. الطايوق الكان بيملسو بيهو الساج.. حرد وفات بقو يملسو الساج باكياس البلاستيك.. العولمة اضانك طرشا .. وشركات الاتصالات ما شبعت من جيوبنا بقت تدخل في بطونا بس والله ان سمعو نضمي وسوو لينا الاسكراتش بطريقة صحية عشان نعوس بيهو الكسرة يكونو ما قصرو بدل ما نجدعو نستفيد منو..ونكون نتحاسب بالثانية وكسرتنا صحية... سيادتك ان داير توصينا وصينا علي البليلة.. وقول ارجعو للبليلة.. واللا ارجعو لي (نبقة الفقرا). لكن ان بقيت علي النبقة.. لملم النبق الفي البلد دي كلو واحفضو لينا.. واول ما الجماعة ربنا يسهل عليهم ويمهل علينا. شتت النبق. وكل خمسة مواطنين في نبقة.. لكن عشان ما يحصل ظلم.. كوّن ديوان سميهو( ديوان تقسيم النبقة).. عشان يكون التقسيم ذاتو تقسيم قانوني ومسعولة منو الحكومة.ومافي زول يظلم التاني.. وليكن شعار مرحلة ما بعد الانفصال( الفقرا اتقسمو النبقة) اتقسمو النبقة خارج اطار اتفاقية نيفاشا. ولابد من تفعيل الشعار.والله سيادتك وما طالبني حليفة.. نحن خايفين من الانفصال . وتجي انت وتقول الراجيكم اريتو ما راجيني.. وكان لقيتو حاجة تاكلوها تعالو عضوني في نص راسي.. سيادة الوزير انتو ياكم الناس المسعولين مننا بدل ما تقولو لينا ما تخافو تجو تخلعونا وتقولو لينا واسجمكم ..و.. رمادكم.. بدل ما تقولو نحن عملنا حساب الانفصال.. ووضعنا خطة . عشان الناس ما يحسو باي حاجة؟.وتب ما تخافو..؟..تقول لنا ارجعو للكسرة . ونحن اصلنا ما فارقناها لي هنوك.

قفل الباب:-

إذا عَضّ باِالأحْيَاءِ مَحْلٌ فَإنّنَا- لَنا

السّورَةُ العُليا على الزّمنِ المَحلِ-

وَإنْ نَكَثَ الأوْتَارُ حَبْلاً لمَعْشَرٍ،-

أقَمْنَا عَلَيْهِ غَيرَ مُنْتَكِثي الحبلِ

- إذا جاشَ بَحْرُ العِزّ مِنّا تَلاطَمَتْ

- أوَازِيُّ مِنّا بِالخُيُولِ وَبالرَّجْلِ..