المشاطه

تجي دايما بعد الفطور كلامها كتير تجيب اخبار الحلة والحلة الجنبها وجنب الجنبها
الراجل الداير يعرس فوق مرتو عارفاهو والراجلها بيجي سكران كل يوم ويبيتها بعلقة عارفاها و الولدها جاء الطيش والولدها جاء الاول والولدها ما جاء خالص برضو عارفاهن يختوا لها البنبر في نص العنقريب تقعد فوقهو من فوق والدايرة تتمشط تقعد فوق العنقريب تحت البنبر مباشرة والاتنين متجهات في نفس الاتجاه عند كرعين الدايرة تتمشط ربطة سلة ولا جورسية وفنجان فيهو شوية زيت وعلبة لبن النوع الصغير فيها دهن وقبال المشاط باسبوع تبدا المتمشطة في نقيض شعرها وتفرتكو واحدة واحدة بمساعدة غالبا ودون مساعدة نادرا
تفرد المشاطه الشعر الي نصفين وبعدين كل نص الي تلاتة اتلات التلت الامامي عشان المساير ولو عاوزهو بدون مساير يكون قسمين بس ودي اسمها السودان قفل يعني الشعر ما مقسوم لا اتنين ولا اربعة ... وكان كل منطقة عندها طريقة خاصة في فالمشاط والمسايريخلوها دايما بدون مشاط وتبدا تمشط من نص الراس ومتجهة الي خارج الراس يمينا او يسارا غالبا عملية المشاط تاخد يومين ...
تمسك المتمشطة بالسلة او الجورسية وتبدا تسويها جدايل طرف الجديلة الواحدة يكون بين الابهام والسبابة من اصابع القدم والطرف الاخر في يدها وتبدا المشاطة في الشغل ومشاط دقاقة و كل ما كان دقاقة وجاي مظبوط وقاسم الشعر قسمة الحلال والبلال في الراس.. دي مشاطة ممتازة وتصنف على انها درجة اولى والونسة مع عملية المشاطة... تبتديء المتمشطة اخبار الناس وتاخد اخبارها عشان توزعها في الحلة .......
ودايما تتغدى في بيت المتمشطة لمدة يومين .... وفي مشاطات بالحجز .... يعني لازم قبل .. اسبوع تديها خبر .....
....... مافي اسعار معروفة والمتمشطة وقدرتها ... ونظرتها للمشاطة شغلها ووضعها المادي وعدد افراد اسرتها واحيانا علاقتها الشخصية بيها .... والمشاطة ليها وضعها الاجتماعي الخطير ... بتعرف البيت الفيهو البنات البقن علي وش عرس .... والبنات السمحات... والشينات... والمادبات .... وقليلات الادب.... ودا بالتاكيد عندو تاثيرو ..... وبرضو الولاد المودبين والمتربين ... والصايعين... وكيفن بتكلمو مع اهلم ... ومنو البيشتغل ومنو المتكل علي الباقين.... وغالبا ما كانت تستشار في الزواج بطريقة مباشرة او باللفة .... عشان كدا يومها التجي ... تكون في حالة طوارئ في البيت .... يدسو الدايرين يدسوهو ... ويورو السمح العندهم ...