سلام يا الجاهله

سلام..يا الجاهلة
----------------------------------------------------------------------------

في جلسة عصرية اجتمع نفر من الهمباتة عند الجاهلة (أسم فتاة صاحبة قهوة) لشراب القهوة وحقيقة الجاهلة مِي جاهلة نصاح ودعونا نطلق عليها اسم (سلام) فهي من سكان مدينة القضارف و تنتمي لقبيلة الأمهرة ذات الإصول الإثيوبية الحميرية اليمنية فبنات الأمهرة مشهود لهم بالجمال الباهر و القوام الفارع..جمعت هذه الجلسة نفر من محبي الشعر الشعبي و كان في الحضور إثنين من الهمباتا وهما ود أبو شكرة و أخوه البشرى و هما أخوان شقيقان من أشعر شعراء الشكرية الشباب في العصر الحديث (المدرسة الحديثة) –
يبدأ الهمباتي البشرى برمي السلام على هذه الحسناء وكان مفاده الآتى:

سلام..يا بقة العسل الشِرِق مصّاصِك

سلام..يا ظبية الوادي الكُتار قُنَّاصِك

سلام..شاوياني نارك وطول نهاري بساسك

سلام..هاريني ريدك وفي القلب رصاصك
******
سلام الجاهلة ياود أبشكرة زادو شقايا

سلام..ريلاً مَهَقَّتْ جوز خدودو مرايا

سلام..ست اللهيج نارك شَوَتْ أعضايا

سلام..ديسك ضلام الليل والعيون ضوايا
******
سلام الجاهلة يا أبشكرة..مِي غالاتة

سلام..يا برطم العسل اللذيذ ..شوكلاتة

سلام..الجاهلة يا خلاّني زايدة غلاتة

تتلاصف خدودها وبرضو زايدة حلاتة


فيردف السلام أخوه البشرى بقوله:


سـلام يـا ملكـة وسكونـك أديــس

سلام ظبية جبال كَرَنْ الكَسَاها الدِّيْـسْ

كان ما خفت مـن الله ولعنـت ابليـس

تكوني الراهبة يَمْ وجنات وأكون قِدِّيِسْ
******
بالسين:سيـدة الستـات مِتِـل امريكـا

باللام:لونها زي تبري ومِسِنُّوْ سَبِيْكَـة

بالألف:أشـا داييـب سبـغ ليكـا (1)

بالميم:مالكة لقلوبنا ومِسَاهِـن شِيْكَـة
******
قول لأبْسِنْ جَمَالاً شُفْتُو فـي الحبشيـة

فزَّزْ نُومِي من عَيْنَيْ صَبَـاحْ وعَشِيَّـة

حلوة أديبة راقية وِحَيْشَة بِتْ وَحَشِيَّـة

سَاطَتْ عَقْلِى بي مُسْوَاطْ كِتِرْ هَبَشِيَّة (2)



(1) التحية بلغات (هندي -لهجة البجة -ارتري)
(2) اصبح مجنون ويكثر الهبش


ويرد عليه ود أبو شٌكرة بهذا المربع


سلام القاصده يا عزنا مهيريه!!؟

العرضت جمال سارقاه من وطنيه

والقالت مهيره صديقته الشايقيـه

خفة دم وذوق جلسات وطيبة نيه

-------


فيعقب البشرى سلام أخيه بسلام آخر :

سلام يا ملكة الدار البقت محمية

سلام يا الشبهوك ظلما علي الحورية

شن اوصف واقول دعجك كهارب اللية

رمشك في القلب بغرز سهامو المية
*****
خدك ما الحرير انعم واظنو شوية

من التبري شال لونو وشرب حنية

فرة ثغرك البرق الشلع في الصية

جيدك ما الغزال كفلك بديع يا بنية
*****
ديسك هردبيس الليل قبل دغشية

كتفك لي الشعر فرش الضماير حية

ممشوقة قوام ماكي الطويلة النية

ما اتشابيتي يوم ايدك تندّي ترية
******
سلام يا الساكنة في البلد البقت محمية

سلام يا عزة ليك يا الشلتي ضي عينيا

شن فايدة قليب انشال بلا جودية

هاك الروح كمان والله برضو هدية


--------

ورغم سفره المتواصل يجد الشاعر الهباني ود أبو شٌكرة قليل وقت ليبث هذا المربع :


سلام ليكم جميع والخاص يجيك يا سلام

سـلام ظبيـة أديـس الفاقـت الارام

سلام يـا الفُقتـى اقرانـك ورا وقـدام

سلام يا ملكة الحبش السكونـه بًشـام
****
سلام يا الفيكى غنو فطاحلة الشكريـه

سلام يا اللى غًناكى خرتى بى الزنديه

سلام يا البِضوى ألماظك جهر عينيـه

تسلمى يابدور اومـاك ونجـم أبريـه

فبينما كانت تتراقص القوافي طربا وتعزف المشاعر نغما فينساب بوح هذا الإحساس ليرسم لنا ملامحه في لوحة مطرزة برقة روعة الإبداع بأسلوب جميل ساحر وكلمات عذبة تنحني أمامها الهامات العظام من بوح إبداعها فيرتاح الشاعران قليل ليخرجا خارج راكوبة الجاهلة و يتركون الحضور و كأنما إنسدل الستار عن مسرحية من مسرحيات وليام شكسبير ليتنفسوا الصعداء و رزازات دعاش المطر الهابة من جهة الدالي و المزموم كأنها تحّرك شياطين أشعارهم التي يستمدون منها وحي إلهامهم ثم سرعان ما يدخلون الراكوبة مرة أخرى و تنهال عليهم تصفيقات الحضور طرباً برجعة الشاعران المبدعان و تبتسم الجاهلة لتبرق أسنانها الناصعة البياض المفلجة بريق وامضاً
ويعود البشرى مرة أخرى في رد طويل هذه المرة معاتباً أخاه الذي سلبت عقله هذه الحبشية الرطانية ذات العربي المكسر

دربك ماشـي ويـن يا أبشكرة فوقـك ديـه

يا الكاسينا بي الابداع وبي الأخلاق وحسن النيه

نار كورسيـك مسخنـه فـي النوافـذ حيـه

كيف تنساه لو بشار جلالة قدره جاكـه عشيـه
--
وينـك يـا اب حجـل يـا اب طلتـاً عفويـه

ليـك عشرتنـا هانـت وتبعـتـه رطانـيـه

فـارس دار جعـل مـا فوقـك المحـريـه!!

تنسى منابع التاريخ ودق التور وقصـة ريـه
--
تنسى المـك نمـر تنسـى السيـوف مسقيـه

اهو عيون ناس سـلام زيـك تجيبـون ميـه

وهاكـم منـي قـول يـا معشـر الشكريـه

والكاينـه التكـون باقـي العمـر عـاريـه
--
قمت بـراي عصـر قاصـد مـرادي بنيـه

بركـت اب سـدر عـن بابـه فـي القطيـه

جات بالفركـه لافحـه القرمصيـص متنيـه

ذي ورتابـه قامـت مـن قصيبـتـاً نـيـه
--
دخلنـا الليـل سـوى والريلـه حنـت ليـه

مـا جـادت كتيـر دسـت شعـوره الحيـه

يـا جنـات سـلام عنبـك لـمـس ايـديـه

سهـر الليـل معـاك والله شايـفـه شـويـه
--
بي شمس الصبـاح هـدر اب سـدر بكريـه

عقلـي الطـار سـلام ملكـة سبـا الحبشيـه

نسيـت القبلـه ويـن وتـلالـك الشرقـيـه

والشـئ العجيـب ايضـا نسيتـه وضـويـه


----------

وإذ تحس واحدة صاحبة قهوة أخرى مجاورة لقهوة الجاهلة بصيرة بعلم الطب الشعبي يلقبوها بالحكيمة (الدكتورة)بأنها مستفزة بابيات من سبقها من الهمباتة تنشد قائلة

سلام يا الكتفتي الرجال بي ديسك

خليتي الخلق تتراطنبو حالي حديثك

شرارة نارك صابت قليبو جليسك

ما ظنيت طبيب بشفيهو منو حسيسك

******
سلام يا ملكة الريل في خلاهن

سلام ضحكاتك حزن ما غشاهن

نديداتك بي فتنتك فارقاهن

سلام إنت العيوب خلقتي بلاهن

*****
سلام يا ست السماح و مليكتو

إنت القمر دورين -زاتو- ماكي شبيهتو

فارسك ما خبر كيفن يلاقى طريقتو

طول في كبل حسنك ناسيها فريضتو

******

سلام يا البي كاحلات عيونك فتي الأرايل

قافي عجز لي وصف الحسن مو طايل

المولى فوقك ردمو السماح الكايل

قاسي ليمك خلى العين تكب متل السحاب الشايل

============

ويرد عليها ود أبو شُكرة بقوله

يا سلام يا الحكيمة مـن نمـك الوصـاف

وبالسماعه كشفك لي سلام انصـاف

ورينا يا دكتوره كيف بتعالج الرجاف

لو ايد سنارك من السـلام بتخـاف



---------

وترد عليه الدكتورة ايضا بما يلي

ود أبشكرة أخوي الريدة ما بتنهاب

و الريد ما بفرز فقير و أرباب

بي شوفة المحبوب مرضان السنين بنطاب

و سلامو بيرد الروح من دون زعل و عتاب

******
يا أبشكرة الطب حار في أمر الريدة

من فعايل الإنس و ألا ساحرة مريدة؟

القلوب بتريد و العقول بي ابتلاها شريدة

إن صابت سهامها زولها بلزم التشهيدة

*****
الزول البريد ما تسائلو كيفن حالو

حال العشق بين في في عضاه و نحالو

غالبو الموت و بلا المعشوق حياتو ما بتهنا لو

ما بدور عرفة طبيب خبر المجرب فالو


--------

ولا يفوت ود نصيري أن يختتم بتحية الجاهلة و أقول:

--------------------------------------------------------------------------------

سلام للجـــاهلة حين شالت قليبي معاها

سلام أرض الخواجه وكلْ تراب ضماها

شالت مني روحـــــي وباللهيب شاوياها

آه .. من سين مفدَّع ومن لِحاظْ طالْقاها
***
سلام يمتدَّ لي لحْظاً ملك أحشــــــــــــايَ

ســـــــلام يا النايره بسْمة سنِّك الضوَّايا

محروق جوف زمان بجاوي ليَّ ضرايَ

وفي شـــــــــان عزَّنا دعَّشْتِ ليَّ مسايَ
***
سلام ست الحسان والراء تجيد ترديدها

مكتول بالعيــــون واسرني مقطع جيدها

كلْ ما أقــــول أتوب نيرانها زايده هويده

كيفِن الوصول للســـــــــامية فينا سعيده