مسدار الصيد للحاردلو

مسدار الصيد
الشاعر / محمد أحمد بك أبوسن ( الحاردلو )
--------
الشم خوخت بردن ليالي الحرة
والبراق برق من منا جاب القرة
شوف عيني الصقير بي جناحو كفت الفرة
تلقاها أم خدود الليلة مرقت برة
******
تعرف لي مشاهيد الرقاد والفرة
فلاخ المصب بيه بتبين تتورى
فوق حيا فوق محل من الصعيد منجرة
ويا باسط النعم تسقيها في ها المرة
*****
أب عراق فتق قرنو المبادر شره
والباشندي عمت مهششيب الدره
من النقرة كل حين فوق عليو منصره
وها الأيام محاريها القليعة أم غرة
*****
قدمت من هنا وبي أضانا سمعت كره
وفوق كرتوت شخيتيرا تخين خر
قلاتو الوهاط بي لشقة قبلو محري
يا باسط النعم ما تلقى فيهو مضرة
****
بت المن قرين مرقن علي الجبال
وفوق (بيه وبلوس) مابرجن الوبال
صفرا درعتن تتدلى لا البهال
وبيضة شاش قرابيبن تريع البال
*****
مرقن يا مجيب لي جملة السؤال
شاحدك تجمعن من مطبق الحلال
ما ينقص حساب الدرج ولو بي عجال
ونحن نجيب لهن في كل يوم موال
********
من (بيلا) الصباح إتسربقن همال
والدوف فوق حقائبهن كترتو جمال
الخور العطيش بلدا عزاز ورمال
ومدروك ما هو من حر النهار بي كمال
******
قطعن (ودعول) بجرن شفاقي عدال
ختمن مقرح الحربة الجبالها طوال
قلت أمات قرود وردنو بي القبال
وخلقا كيف برمولن دمير حبال
*******
من امات رميلة متركشات لا شمال
وسمعن هدمي لا قدام كرير أضلال
بشلحط بريقن راح يشيل ولوال
تيسن زاعلن باكر مع الشهلال
*****
خلاهن رتوع في بقيل وخرجة نال
لا مت دور الوادي السرى سيال
فوق قمزوز طلع شاف في ملينو زوال
وقلعة (كو) حفيرها لقالو فيها نعال
******
مطامنات هناك لامن نهارن زال
وشرفن كلهن شمن دعاش اتعال
مابيات البلد دايرات حقو السروال
وصفا متع الغناي قدر ما قال
****
في عاقب نهار سون لهن مرحال
وعينيهن خلقن زرق برا كحال
من كرف الحويل بقين دحين في حال
وديل ليمن على الناس المتلنا محال
*******
جاهن منزقف وقتا عصير وشفاف
وكاسب ليهو بيهن من صدف ما بخاف
ديل الطبعهن دايم الأبد عواف
في نايط السروج لقين بقيلا جاف
******
حجار المزار المن بعيد بنشاف
جرن فوقو دورن للفقر عراف
لافخ ود نهار من البحوم طراف
ولقى سبرون بقيلو من الملين مو جاف
******
شاف برقا بقل فوق الجبل رفراف
وهن وحل الدرار يا الليلة منو خفاف
من عند المضيق مرقن هناك بي سناف
وديل قسين علي القوي والمتلنا ضعاف
*****
لونهن من بعيد متل البليبلي نضاف
مرد ومعصرات من شبة الأكتاف
للناس البغنو لن يجرو القاف
ماليات الخشم من كامل الأوصاف
*******
اتنشلن من الغبشة أم صهيب ناموس
وجين بين القصيرة وفوق فريع قلبوس
سدر المرمى لقين ردو مو مانوس
ووقعن بين حقاقيصو المعيز أربوس
******
خلاهن علي حجير الصفية حبوس
ولقى في الدهسريب قمبار وعرق فقوس
في المخلوقة شن تشبه معيز ام روس
غير الفي وريدن شولقن مرصوص
******
تيسن لي مراتعن تملي بكوس
وديمة بقل علي البرق البشيل حرقوص
كم ذولا رقد فوق دربهن ممغوص
ومنو اتخلصن ماصيدن جاموس
*****
قامن منها اتنين مضاكرة تيوس
ولقين في السمير خطا وجيع مكبوس
دمجا أزرق مشهادو مو معفوس
ومنو بيردن الميع المقامو البوص
*****
اخدن في الميع دورين حسابهن تام
ومن أوديت بزوال شرفهن قدام
طلعن قوز كديس جاهن صقيط نمنام
ووصلن حد بطانة مرتع العدام
******
الهبريم طلق جاب للميع حوام
ومن شهر النفاس فضلن لهن أيام
جين راجعات من القوز المقامو تمام
لونن يشبه البفت الجديد والخام
*****
ديل الطبعهن بالحيل خفاف وهمام
وفي سمير ود حريري مضقلات كل عام
قربن لي مواليد الرخيس وبعام
ومن عين البعاين سورة الأنعام
******
نون بالنجيع يا سابل الأكمام
اسبل سترك السابل علي النوام
تيسن جك مغرب وبي الملاين حام
جاهن وعافطنو وحيل سدوهن قام
*******
من دعت السراويل قبلهن دراتات
وفي العشنوق لقن زوزاي وبي فارات
عسكر خاف عليهن في ضرا نالات
وجاهن وجاعرن بعد النهار ما مات
*******
ختمن شابلك العارق التلات سدرات
وهكعن فوق عزاز حمريبه ام سوبات
دايش ليلي تام ما لقيت لهن مرحات
لامن هجسن باكر علي الطلحات
*****
خلاهن علي رد الفروخ بايتات
وفي المكفي الورا أم ميمون لقي ختيتات
متماسك سدوهن وبالحدوب شاتات
جاهن وجاعرن وجنو منحتات
******
ديل الديمة من رد الأنيس ناجعات
وكل حين فوق عليوا زاوي منجمعات
ضمر خلقة ما من قلة معيش ضايعات
تيسن دور الوادي الورا القلعات
*******
خلاهن علي رد الدموكيات
فلخ الفار مسيلباتو اتلقن باردات
في ترتير شدير ومعاهو حمريبات
تقلن وحضرنبو اللي النفاس دانيات
******
اتحلن جناهن في ضرا نالات
لامن درجنو وجف من السيبات
كم فوقن دقونا ولفن قافات
وقالن دوبا ليهن في الزمان الفات
******
الحي في الوجودو القالو قبلنا مات
كلو بلا هي بي لهج الطريفيات
شن ما قلنا فوق عنف الرقاب ساويات
قبلي ود أب شوارب جاب لهن كلمات
*****
يا باسط الأراضي والسبع سموات
وكلو الدابي حاف وأبو نعلات
دغس العين تنجيهن من الآفات
لا من وخرن بيلا المعيز ناجعات
*******
مرقن من مطيبقات الخوي أب دنان
وهكعن فوق معالق الوادي أبو ريحان
شافن في السمير سايمة وحيامة إنسان
وطلعن ها القليع المسمى بي النسوان
*****
المعزي المراتعهن سهول وقنان
انجبدن ثناييهن سداد في سنان
بعد ما اترقدن بي مطبق الوديان
يكتب لي لماهن ربنا المنان
******
كلبي الشارعو فيهن جا منقلب هقلان
واتحير قعد ساكت بقيت محنان
تيسن ديمة من حر الرحيح كملان
وجاهن من قفر بلدا بعيد ضبلان
*****
من الفجخاء هبر خـــلاهن
لا من دور أمات رميلة وجاهن
عند المتني فوق عاجبا جديد لماهن
ختمن بيلا فوق ميع البقر دلاهن
*******
المعزي البجازن ديمة فوق في خلاهن
بالغات النصاب أنصاري ما زكاهن
من ود البصير جايب إذن بغناهن
شوفن يا الزبير في لساني ديل ما احلاهن
******
جفلن من زوال شوفا بعيد باداهن
عرقن ود عول وادن قليلة قفاهن
ناس ابن الذريح ضربو المثل بي غناهن
من كاف السوام الميرغني بينجاهن
*******
من عوج الوكت ما بتركن وانساهن
فوق حيا فوق محل دايما بكوسو رضاهن
ملزوم بي مراتعهن وخبرة ماهن
وصلنو المصب واتوكرن في خلاهن