الدوبيت

واحد واربعين بت اللبيب عبدالله
لا حامت فريق لا جالست خلق الله
نفسك مستكا وحاجبك هلالن هلا
وشوفتك تسند الراقد سنين ما وّلا
واحد واربعين بت اللبيب عثمان
لا حامت رفيق لا جالست صبيان
نفسك مستكا وحاجبك هلال رمضان
وشوفتك تسند الراقد سنين مرضان
_______________________________

البت القبيل في عزها وفخودة
في غابة القرنفل تلقاها مادة بلودة
تتوسد حرير والصندلية برودة
ما شافت شمس من القمر مورودة
________________________________
عربا ليّا ياريح مابتجيبى اخبارُن
قالت ليا مبسوطين وزينة ديارُن
ياحليلهن كتير بتضارو من شين جارُن
وبعد الهجعة للضيفان بتوقد نارُن
_________________________________
واباروك علي عربا بناهم خيش
نزحو مشرقين قالو الخدار شقيش
نزلوا مطرفين خايفين خلية الديش
بكفو الضيف سمن لمن يقاوي العيش
_________________________________
الليله الضحى لاقيته في الراكوبه
عيني فتحن والعافية ضقته هبوبه
أضحك وانبسط والعب معاك يا الروبه
ثلاث سنين وفر من عمرى ما محسوبه
----------------------------
الليله العشا طلعن تلاته نجوم
اتنين في الشرق والتالته في الخرطوم
بت الناس العزاز تتنى المخده تنوم
حرقت جوفى انا وخلت كبيدتى تعوم .
________________________________

ياليـــــــــــــــــــل السفر أرجـــــــــــــــــــوك ابقى قصير
وديني لى زولا وضع ايديهو في زهر الخدود متحير
في بسمــــــــــــو البروق لليل يزيح وينــــــــــــــــــور
ياحافــــــــــــــظ أخوي لغيرو ماني بـــــــــــــــــــــــدور
____________________________________________________________________
الــــــزول السمح حلو النغم في كلامو
مزيون بالجمال لابس العفاف هندامو
من نور القمر شايل جمال أبسامـــــو
من شوفتــــو العيون لاصحو لانامـــو

شديت الرحال لقمرنا صبحا بـــــــدري
لاقيت النجوم سبقني قبــل الفجـــري
سلمت وجلست قالن حباب التبــــري
مافرقت يمين بين القمر والبــــــدري
_____________________________________
اسمك سين وحرفك سين وذاتك سين
منسوجات حروفك من العنب والتين
اسمك في أول براءه وآخر حروف يس
لا الشام لا اليمن لا أروبا لا أرض الصين
________________________________________
نغمك سكر والسكر قصب مزروع
ونغمك يشفي لي واطي الجمرة والملسوع
نغمك بسمة الفي أسبوعو يادوب موضوع
ونغمك نفحة تطرد لسنين الجوع
________________________________________


أنا يا ابتله ســــافعة العشا البتقوقي
قلتها أ كٌرسي نومي وضيفي سهدك فوقي
من قليبو أليل والطعم معــــــوقي
صديتا تاني لي مضغ «الغنا» وحيروقي


جيدك والبراق فرسى رهــان وندايد
حقبك والفلو الفوق النحـــاس مزايد
مايقك والجدى الضارب عسـينو ونايد
فرك وســـاطع المزر أم صبيباً قايد

______________________________________

خايفه الجلهله من حر الشمس الاحت
وجرت توبا من لفح السموم الفاحت
ضاروها الخدود والشامه في التوب راحت
ان خلوها بشوف متلي كان ساحت
_________________________________________

قال ود الفراش

أنا التوب الجميل الباهي زوقو
وأنا الدابي إن رصد للزول بيعيقو
أنا الفرج للعيال ساعة يضيقو
وأنا المامون علي بنوت فريقو

____________________________________________