رباعيات في الغزل لدى شعر الدوبيت و المسادير

الرباعية الأولى :

إن مدحوكي يصغروا من مديحك ناس
وإن وصفوكي وصفك ما بشيلو الراس
وإن قاسوكي وين ليك يتلقي المقياس
إنتي مكمله وغيرك رُبُع وأخماس

*******************
الرباعية الثانية

زي جدي الغزال كاحلات عيونا وزينه
وإن قامـت مشت تقـدل متل وِزِّينه
السبب القبيل خـلاها تبقى حزينه
قالت لي بخـاف عين الحسـود تأذينا
************************************
الرباعية الثالثة:
زي مهر السبق في مشيتو و رحيلو

ضامر هافو تُقل أردافو هدن حيلو

طلقولوا البخور جدع عقودو و تيلو

طبق البوخة قام عرقو الصفيح ما يشيلو
****************************************
الرباعية الرابعة

من صدر القمر رضعت روت وجناتا
ومن ضرع الغزال حلبت سماحتا جاتا
متل الضل بشيش جوا القلوب ولجاتا
تسكن في النفس تتـاوى في خلجاتا
********************************
الرباعية الخامسة

قدر مـا قلت أتوب من الغـرام وفعايلو
يبراني ويفـوح طيب المسك في جدايلو
كيف عاد الفكاك وانا قلبي مـا كت قايلو
يبقى الـريد دوام في كتفو حايم وشايلو
********************************
الرباعية السادسة


تجيك بي مهل والفلجه.... لما تشوفا
عنقا باهي مخروطه ومضمر جوفا
زي مهر السبق متحضره ومكلوفا
قلبي الكان صميم جابتلو فره وخوفا

************************************
الرباعية السابعة

يا قصيبة الـوِادَي الشال برم قندولا
لبَّن وإنتنت سـاقا النحيل مـا بشيلا
إن نضمت متل سجع القماري هديلا
وإن ضحكت مطر يجرف رويحتك سيلا

**************************************
الرباعية الثامنة
إن مريتى فرعا بالنسايم مـــــــــــاس
وإن مسوك من مسك بخافوا المـــاس
فى صدرك قنابلا خوفن فُـــــــــــراس
وفى عينيك بتوه الزول تقول مو حاس
*************************************
الرباعية التاسعة
آه من نارك السمحه اللهيجه عسيلا
وآه من خدك الوصفو النضير وأسيلا
وآه من وصلك التب ما لقيتلو وسيلة
وآه من دربك الإصلو ما لقيتلو سبيلا